3:12 PM

:: الحلزونة يامه الحلزونة ::

جلسة في مجلس الشعب


سيادة الرئيس حضرات الاعضاء الموقرين
ان عايز بس أرد ع الاخ اللي بيقول ان الحكومات بتتخانق وبتخبط في بعض
لأ بقي لازم كمان نتكلم عن الحاجات الإيجابية
من أربعة ايام فيه قطر طلع من الجيزة وصل العياط زي الفل
ماحصلش أي حاجة والركاب كانوا سعداء كلهم قعدوا يغنوا " الحياة حلوة للي يركبها "
هو احنا هنقعد بقي نمسك في القطرات اللي بتتحرق ونسيب القطر بتاع العياط لا ياجماعة لأاااا


طيب انا بقي عادة باركب القطر وزي الفل وكل الشبابيك متركبة علشان الصيف بقي

وفي الشتا بيخلعوها علشان ماتتخنقش من السقعة اللي في القطر
وطبعا القطارات كلها تمام ولا فيها حوادث ولا اي حاجة هي المشكلة ايه
القطارات كتير ومش عارفين يودوها فين كل قطر يقول انا عمشي علي الخط ده
والقطر التاني مايرداش يقعدوا يخبطوا في بعض بقي الحكومة هتعمل ايه
وبعدين مافيش فلوس ولا ملايين في السكة الحديد علشان يصلحوا القطارات
هيعملوا ايه بقي بتوع السكة الحديد يصلحوها من جيوبهم


نيجي لرغيف العيش


اللي عمال يقولك دا فيه مسامير واللي يقولك دا فيه إزاز واللي يقولك دا بطعم مش عارف ايه
طب أنا النهاردة بقي وانا جاي مجلسكم الموقر عديت علي فرن فرن بلدي عادي خالص جبت رغيف عيش
أنا بس هاوريكم عشان بس حضراتكم تتأكدوا بنفسيكم - وطلع رغيف قطرة نص متر - طبعا
رغيف عيش أهو بشلن خمسة قروش زي الفل دا بسكويت ياجماعه مش عيش , اتفضلي ياحاجة دوقي
دوق يامعلم دوق دوق مايهمكش , هي المشكلة في ايه الواد اللي بيشتري العيش وموديه لأمه بيكله
قبل مايروح بيتهم أمه تسأله يقولها مليان مسامير ومليان إزاز ياجماعه هي دي المشكلة


فعلا ياجماعة هو الواد اللي بياكله علشان كده من اسبوع جبت رغيف عيش من
فرن بلدي عادي وطبعا الرغيف قطره 50 سم يعني يكفي البيت كله
تقعد تاكل تاكل ومابيخلصش قاعد باكل عادي لقيت حاجة بتقرقش بجد
فقلت يمكن الملح عدت المرة دي فباكل تاني برده لقيت حاجة بتقرقش بس
ما اتكسرتش المرة دي فجاي باشوفها تصوروا طلعت ايه
زي ماقلتلكم مش ازاز ولا حاجو كان ملح بس عاملينه في شكل ازاز
وانتوا تقولوا العيش مليان ازاز ياجماعة ماتظلموش الناس


الإخواة الأعضاء الايام دي ماسكين لنا في الجرايد ان مياه الصرف الصحي دخلت علي مياه الشرب


دي مناعه بتدي مناعة للمواطن المصري هو انت مش ساعات بتدي مصل للبني آدم عشان لا يصاب
بهذا المرض دا بيدينا مناعة يا اخواننا الشعب المصري عنده مناعة دلوقتي امال هو بيقولك اللي يشرب
من ماء النيل لازم يرجع تاني ليه الخواجات بيجوا ياخدوا مناعة من عندنا , إنتوا بتقولوا إييييييييييييه ؟!
وبعدين ... مياه الصرف الصحي دي جاية منين ؟؟!!
مش جاية من الشعب المصري ورايحة للشعب المصري
مالها فعلا مياه الصرف هي مش من الشعب وراجعه للشعب تاني علشان

ماتقولوش ان الحكومة بتاكل حق المواطنين حتي مياه الصرف بترجعهالهم تاني


وبعدين مالها اليه فيها ايه ماهي زي الفل اهي هات كده كوباية ميه واملاها كده

وحط فيها جهاز التحليل الصغير ده شوف مدي نقاء الميه اللي بتجيلكم
مش هيطلع اي حاجة بس هتلاقي حوالي ا سنتيمستر من تحت في الكوباية

فيه حاجات سمرا كده هتقولوا الميه وحشة لا يا جماعه ده حديد عنصر مهم جدا للجسم
ولا فوقها كمان ييجي 1 ولا 2 سم حاجة مصفرة شويه هو ده بقي النحاس
عناصر طبيعية كلها مهمة لجسمك تخيل كده لما كوباية المية اللي بتشربها

تقريبا تلتها من العناصر دي والتلتين الباقيين ميه مش معكرة ولا حاجة شوف بقي
الدولة بتعملك ايه كلها عناصر مهمة بدل ماتشتري فيتامينات وحاجات


نيجي بقي للأخوة اللي بيتكلموا عن التجاوزات اللي بتحصل في أقسام البوليس أنا هاقولكم علي حاجة


حصلت معايا أنا شخصيا, أحد العمال اللي عندي قفشوه في لجنة ودوه القسم بعد يومين تلاته قلت
أروح أخرج الوله رحتلة القسم لقيتهم شايلينه من ع الارض شيل شيل وعاملين له تورته وبيحتفلوا بعيد ميلاده
وكل القسم عمال يغني
happy birthday to u
انتوا بتقولوا ايه ياجماعة


طبعا بقي أنا شاهد علي الكلام ده كان فيه مرة واحد بيحاول يسرق بيت

مدرس الانجليزي بتاعنا بتاع الثانوي اتقفش وراح القسم وماكانش راضي يقول

ايه اللي خده طبعا بكل زوق وادب ما اتعملوش حاجه كان فيه راجل كده

من المرشدين بتوع البوليس وراه ايده تقيله حبتين يادوب سلم عليه

بس اتكي شويه الراجل اعترف علي طول بس اللي محيرني

قفا الحرامي كان مولع ليه لكن باقي الكدمات اللي في جسمه

لما كان بينط من البيت اللي بيسرقه وماعرفش فوقع
ولا فيه طبعا كهربا ولا اي حاجة من دي في السجون ولا اقسام البوليس


نيجي بقي للاعلام , الناس بتهاجم التليفزيون دلوقتي يا إخوانا فيه طفرة كبيرة حصلت في الاعلام المصري


في التليفزيون الخبر دلوقتي بينزل قبل مابيحصل ب4 ايام



فعلا دي حقيقة اشهد عليها دول حتي الاحداث اللي كانت بتحصل وتقريبا

مازالت بتحصل في سينا دلوقتي والناس اللي بتموت بعض هناك الاعلام المصري

كله جابها وعلي ايه مش الفضائيات كمان علي القنوات الارضيه قبل قناة الجزيرة
بس فيه حاجة محيراني قوي ومش عارفها هي النشرة

اللي بتجيب الاخبار دي بتيجي الساعه كام علشان اتابعها


نيجي بقي لحاجة تانيه خالص الكوسه او الرشوة

مش موجودة ابدا في مصر المصريين اشرف من انهم ياخدوا رشوة

خصوصا اللي شغالين في اماكن حساسة فيها ايه لما يشرب شاي بالياسمين

عند واحد ويخرج معاه شنطة مليانه أوراق مش فلوس طبعا اوراق مهمة

علشان يراجعها يبقي كده خد رشوة
ولا اي حد هيشرب شاي بالياسمين هيبقي خد رشوة بقي


اخلاء طرف........

كاتب الموضوع اللي هو انا غير مسؤول عن اي حاجه كتبها
حيث انه يعاني من بعض الاضطرابات العقليه حاليا
ههههههههههههه

22 comments:

dr.shoshr said...

انت كتبت بوست مليان بالمواضيع
اتكلمت فيه باسلوب كوميدى متاثرا بكلمات عاد امام

نيجى لمشكله القطارات فيها ايه لما قطر يطع متاخر ساعه ونصف عامل المحطه الساعه بتاعته كانت واقفه ماخدش باله

اما العيش ده فسيبهولى بعدين

اما المياه هى فين بس المياه عشان نعرف فيها صرف صحى ولا لأ
ممكن قاطعين المياه عشان يتحققوا من صدق الاشاعه المغررضه

وماله القسم فيها ايه لما ناس تموت فى الاقسام بيحلوا مشكله الكثافه السكنيه
ليه نفترض سوء النيه بس

التليفزيون ياسلام على التليفزيون .التليفزيون الساعه بتاعته ماخره 3 ايام ..يابلاش

اما الكوسه ماشوفتهاش خالص كل واحد بياخد حقه

وكفايه كده عشان مانروحش فى داهيه

Dr MeRo said...

انت دخلت فى السياسه يا سامح و انا و لا اعرفك

يا بنى ده مش بعيد انا اللى اروح ابلغ عنك هو انا ناقص المخبر بتاعكوا ده يسلم عليا :P

جامد يا واد يا سامح و هتودينا كلنا فى داهيه

Shady shan said...
This comment has been removed by the author.
Shady shan said...

same7..3ashan neb2a metef2een

ana ba3d 2awel 2alamen ha2ol kol 7aga
:D

post 7elw..bas el2egabya 2a7san

loverheart said...

dr.shoshr ...
اه تصدق انا اللي نيتي سيئة

معلش بقي استحملني اليومين دول

loverheart said...

Dr MeRo said...
انت دخلت فى السياسه يا سامح و انا و لا اعرفك

يا بنى ده مش بعيد انا اللى اروح ابلغ عنك هو انا ناقص المخبر بتاعكوا ده يسلم عليا :P

جامد يا واد يا سامح و هتودينا كلنا فى داهيه

ماتخافش مش هاقول علي اسمك ياعمر :p :D

وماتقلقش هياخدوا الي بي بتاعي انا بس

loverheart said...

Shady shan said...
same7..3ashan neb2a metef2een

ana ba3d 2awel 2alamen ha2ol kol 7aga
:D

post 7elw..bas el2egabya 2a7san

هتقول كل حاجه وتبلغ عني

دا أنا غلباااااااااااان

نورت ياشادي

EmY said...

اول ما تتأفش مش هاننساك بالعيش و الحلاوه
بوست جامد اوي و كمان انا عجبني الفيلم اوي
خلي بالك من نفسك يا ابني و ربنا يفك سجنك مقدمآ

loverheart said...

أيوا كدا عايزين تضامن من دلوقتي

والعيش والحلاوة ماتنسيهومش مش كلام وبس

loza said...

مرجااااااان احمد مرجااان
هتعيشوا حياتكم بالمجان

منلاقيش مع حضرتك صوره لرغيف العيش!؟


وبعدين ايه لزمه العيش والحلاوه مش فى تورت وجاتوه
ولا عيد ميلاد حضرتك مش اليومين دول :D

loverheart said...

loza said...
مرجااااااان احمد مرجااان
هتعيشوا حياتكم بالمجان

منلاقيش مع حضرتك صوره لرغيف العيش!؟


وبعدين ايه لزمه العيش والحلاوه مش فى تورت وجاتوه
ولا عيد ميلاد حضرتك مش اليومين دول :D


عيد ميلادي :/

لا أبدا عقبال عندك كده في شهر اربعة

طبيب مسلم said...

بوست لذيذ
وعادل امام وكلامه الساخر عن الحكومة
واللي بيحصل بطريقة كوميدية تنسينا اللي احنا فيه
بس برده بافتكر كلام الشيخ كشك
رحمه الله
طلبنا إمام عادلا فخرج لنا عادل إمام

يعني عادل امام بيقدم حاجات تتكلم عن الشعب
لكن للأسف بيدس السم في العسل بأفلامه المليئة بالاباحيات..ومش كلام كبير ..ده واقع وكلنا عارفين كدهد

بعتذر عن الخروج عن سياق الموضوع

أرجوا أن تقبلوني من زوار المدونة

shimaa said...

ايه ده ياسامح ده مانت كنت كويس طول عمرك :P
بس تصدق الدنيا طلعت وردي وردي وانااللي سوده من جوه وبظلم الناس ده معايا صحيح ناس مفتريين
مرسي ياسامح انت المفروض يدوك جايزه على جهودك العظيمه ده من اجل اصلاح البشريه :P

ذكرى إنسان said...

يخرب عقلك يابني

انت دخلت السكة السوده دي ليه

أنا مش قلتلك إمشي جوا الحيط

مممم

فهمت الناس كلها بقت جوه الحيط ، و حضرتك بتتكلم من داخله :)

حقيقي بوست خفيف الظل و مؤثر :)

kalcool said...

الظابط الامور العسول الطيوب جاى ورايا
متخافشى هيسالك سؤالين بس كده على الماشى

هشششششششششش
انا مش هنا

loverheart said...

طبيب مسلم ...

شكرا ليك جدا وفعلا انا باحب عادل امام جدا
باحب الحاجة اللي بيقدمها والقضية اللي بيقدمها بشكل كوميدي لكن ماباحبش الطريقة اللي بيقدمها بيها خروج طبعا عن الحياء

واحنا نتشرف انك تكون من زوارها طبعا

loverheart said...

shimaa ...

معلش بقي السن يحكم
قصدي يعني الواحد فعلا بيلاقي الحاجات دي بتحصل قدامه كتير ليه بقي مانشاركش برأينا فيها

loverheart said...

ذكرى إنسان ...

خلاص ياعم هارجع تاني
بس اوعي تبلغ حد :D


kalcool ...

بلغت عني ياخاين

MARWA said...

ايه دة:huh:
يعني بادوب بس شفت سيلفستر وستايل كدة عجبني اوي وقررت اجي اقعد هنا
ارجع الاقي الستايل اتغير :angry:
بس برضه دة عاجبني وبفكر برضه اجي اقعد هنا:p
بس يا تري بتغير الستايل كل شوية ليه تمويه علي البوست مثلا:p:p
خلاص اكتب لينك الستايل اللي قبل دة وانا مش هتكلم
:D
ياالستايل ياالبوليس هه

sa'7so'7te said...

بعيدا عن انى بحب الاسلوب الساخر ده جدا
فالموضوع جميل بجد مع انى متاخرة فلى الرد بس الكلية تلاهى

و مبروك النيولوك

loverheart said...

marwa

انتي تنوري في اي حته بس تجيبي أكلك معاكي :P

وبعدين انتي نسيتي الباسوورد ولا ايه الحكاية

loverheart said...

sa'7so'7te ...

ان شاء الله منورانا علي طول

ومتشكرين وعقبال عندكم