5:29 PM

::الى فوق::



قافله تاهت فى الصحراء حدد بالظبط مكان تلك القافله بالتحديد؟
لا احد يعر فاذا الى فوق!!
ده كلام المرحوم علاء ولى الدين فى فيلم ..........
لما كان مدرس وبيسال الطلاب والجائزه الجوارى
اكيد كتير مننا فاكر الفيلم ده
افتكرت الكورسات والدروس الخصوصيه والضحك على الدقون..الى اصبحنا بنشربه بالساهل واوقات كتيره مضطرين نشربه
بدات افكر ليه احنا كده ووصلنا لكده؟
الناس بره بيتعلموا مش عشان النجاح الى احنا بندور عليه بس
لا وبناخدله كورسات كمان
مش بقول عشان النجاح بس
من اسبوع بس اثنين من علماء امريكا حصلوا على جائزه نوبل فى الفيزياء...ولا عزاء للعلم فى مصر

مش عارف وانا بتفرج على الفيلم افتكرت الجامعه والمدرسه
لما المدرس كان بيسال سؤال من دماغه ولا موجود على الخريطه عشان طالب من الى بياخدوا عنده درس يقوم يجاوب عليه عشان الطلاب التانيه تغير وتاخد عند المدرس ده درس
تيجى فى الجامعه بيحصل العكس
تبقى قاعد فى المحاضره لابيك ولا عليك وتلاقى كلام مبهم متجه على اذنك والحل الوحيد انك تقعد فى بيتكم وماتجيش تانى المحاضره او تروح المحاضره عشان تنام فى التكيف
والحل الوحيد انك تروح تاخد كورسات (بعد الشر )مش انا الى بقول..
تيجى بقى تشوف الامتحانات جايه من كوكب تانى الى كوكب تانى غير كوكبنا
السؤال هو العيب فينا
العيب فى النظام الى علمنا من صغرنا هو الكتاب المدرسى (الجامعى) الى لازم نذاكر منه؟
ولا العيب فينا الى مش عارفين نعمل عليها تحكم ونحاول نفهم ده كله ليه؟
ولا العيب ى الكثافه السكانيه السبب فى ان الكليات اصبحت بالالوف؟


انا كنت مجهز موضوع تانى خاص بس شوفت الفيلم ضربت الفكره فى دماغى فهاصدعكم بيها
سلام

24 comments:

AmR said...

العيب فيا أنا أكيد
:D


مهو انت لو بتقعد منتبه في المحاضرات وتبطل الهزار والضحك والشعر والكلام الفاضي ده كنت تنفع

:D

Ph.Hamada said...

متميز دايما يا شوشر :)
موضوع جميل ومهم فعلا يا عزيزى , بس انا ملاحظ ان العيب مزدوج , العيب في النظام التعليمى اللى معلمناش ازاى ندور ونبحث على المعلومة وازاى نطلع من الدرس او الحصة واحنا فاهمين مش حافظين وازاى نذاكر عشان السؤال هيجى في حتة احنا منعرفهاش قبل كده وعاوزة فهم , ومن ضمنه كمان الدكتور اللى ما بينزلش لمستوى الطالب وبيتعامل معاك كأنك طالب دكتوراة مش طالب جامعى لسه بتقول يا هادى

وكمان العيب فينا , بقينا بنستسهل وبنعتمد على حد يلخصلنا ويذاكرلنا ويدينا المعلومة واضحة وصريحة على طبق من ذهب , وكأن التعليم ده رفاهية مش حق طبيعى لازم ناخده بالتعب والمجهود والمثابرة

معلش بقى يا شوشر ,انا طولت عليك كتير , بس بصراحة الموضوع يستحق , وبصراحة اكتر انت وفقت تمام التوفيق في اختيارك للموضوع ده , وبالتوفيق :)

ِAmany said...

والله يا د. شوشر انت اثرت موضوع مهم جدا لو قعدنا نتناقش فيه يوم مش هيكفى ومش هتكفينى اى مساحه اكتب فيها
بس اللى اقدر اقوله باختصار ان فيه حاجات كتير اوى مش مظبوطه فى نظام التعليم الجامعى وعيوب كتير جدا نقول المناهج ولا النظام نفسه ولا الامتحانات ولا ولا... وكل ده فى الاخر بييجى على دماغنا احنا الطلبه

وعاوزه اقول كمان ان لو الدكتور بيقول حاجه مفهومه او بيفهمنا اصلا كان كله يبقى مركز معاه لكن للاسف كلنا بنزهق وبنتكلم وبنهزر فى المحاضرات لاننا مش فاهمين اللى بيتقال
لو فيه مجال اكبر كنت اتكلمت براحتى بس للاسف مش هينفع هنا وحتى يعنى لو قولنا رايينا ....

لنا الله

رئيس جمهوريه نفسى said...

اولا اهنئيك على البوست رائع بجد
ثانيا : يا دكتور الغلط فى المنظومه التعليميه كلها من اول الابتدائى لحد الجامعه منظومه قائمه على انك تصم الكتاب وكل الى فيه باسلوب بيقتل اى حيز للابداع عند الطالب لما ده يحصل حنطلع ناس تجيب نوبل من فين
منظومه قائمه على انى ااقل اجر فى مصر اجور المعلمين البديل الدروس الخصوصيه علشان يعرفو يعيشو ولما عملو كادر مش عارفين يجيبو ليه فلوس من فين
منظومه قائمه على اب عايز يشوف ابنه دكتور ولا مهندس ومش مشكله الولد عايز يكون ايه
اسف للاطاله رغم انى مقلتش حجات كتير

dr.shoshr said...

:amr:

العيب فيا أنا أكيد
:D
مهو انت لو بتقعد منتبه في المحاضرات وتبطل الهزار والضحك والشعر والكلام
الفاضي ده كنت تنفع

ماهى دى حاجه مفروغ منها ان العيب فيك :d
وبلاش انت تتكلم على المحاضرات عشان انت عارف :@
نورت ياباشا:D

dr.shoshr said...

:ph.hamada:
متميز دايما يا شوشر :)
موضوع جميل ومهم فعلا يا عزيزى , بس انا ملاحظ ان العيب مزدوج , العيب في النظام التعليمى اللى معلمناش ازاى ندور ونبحث على المعلومة وازاى نطلع من الدرس او الحصة واحنا فاهمين مش حافظين وازاى نذاكر عشان السؤال هيجى في حتة احنا منعرفهاش قبل كده وعاوزة فهم , ومن ضمنه كمان الدكتور اللى ما بينزلش لمستوى الطالب وبيتعامل معاك كأنك طالب دكتوراة مش طالب جامعى لسه بتقول يا هادى
وكمان العيب فينا , بقينا بنستسهل وبنعتمد على حد يلخصلنا ويذاكرلنا ويدينا المعلومة واضحة وصريحة على طبق من ذهب , وكأن التعليم ده رفاهية مش حق طبيعى لازم ناخده بالتعب والمجهود والمثابرة
معلش بقى يا شوشر ,انا طولت عليك كتير , بس بصراحة الموضوع يستحق , وبصراحة اكتر انت وفقت تمام التوفيق في اختيارك للموضوع ده , وبالتوفيق

والله موضوع معامله الدكتور مع الطالب بتاعه صعبه جدا
تحس ان الدكتور مش بيكلم طالب عادى لأ زى ماانت بتقول طالب دكتوراه

امابقى بالنسبه لعمليه ان احنا بندور على ملخصات وبنستسهل فده بسبب انهم عودونا من الصغر على ان المصدر الوحيد هو الكتاب
مافيش حاجه فى خريطتهم ان يكون فى طلبه مبدعين ..انما فى خريطتهم ازاى ننجح الطلبه دول عشان يجى غيرهم

منورنا دايما ياحماده :D

loverheart said...

أنا بأضم صوتي لصوت عمرو
اصل بصراحة احنا بندخل المحاضرة عمر
ييجي يقعد جنبي يبقي تنسي المحاضرة دي

dr.shoshr said...

:amany:
والله يا د. شوشر انت اثرت موضوع مهم جدا لو قعدنا نتناقش فيه يوم مش هيكفى ومش هتكفينى اى مساحه اكتب فيها
بس اللى اقدر اقوله باختصار ان فيه حاجات كتير اوى مش مظبوطه فى نظام التعليم الجامعى وعيوب كتير جدا نقول المناهج ولا النظام نفسه ولا الامتحانات ولا ولا... وكل ده فى الاخر بييجى على دماغنا احنا الطلبه
وعاوزه اقول كمان ان لو الدكتور بيقول حاجه مفهومه او بيفهمنا اصلا كان كله يبقى مركز معاه لكن للاسف كلنا بنزهق وبنتكلم وبنهزر فى المحاضرات لاننا مش فاهمين اللى بيتقال
لو فيه مجال اكبر كنت اتكلمت براحتى بس للاسف مش هينفع هنا وحتى يعنى لو قولنا رايينا ....
لنا الله

اه والله لو الدكتور بيتوهنا معاه يااما بنهزر يااما حاجه مهمه حذرتك نسيتيها النوم:D

الواحد مش عارف هو ماحدش من المسئولين شايفين او حتى حاسين او شامين الوضع الى احنا فيه ده

لنا الله

منورانا دايما يادكتوره:D

dr.shoshr said...

:رئيس جمهوريه نفسى:
اولا اهنئيك على البوست رائع بجد
ثانيا : يا دكتور الغلط فى المنظومه التعليميه كلها من اول الابتدائى لحد الجامعه منظومه قائمه على انك تصم الكتاب وكل الى فيه باسلوب بيقتل اى حيز للابداع عند الطالب لما ده يحصل حنطلع ناس تجيب نوبل من فين
منظومه قائمه على انى ااقل اجر فى مصر اجور المعلمين البديل الدروس الخصوصيه علشان يعرفو يعيشو ولما عملو كادر مش عارفين يجيبو ليه فلوس من فين
منظومه قائمه على اب عايز يشوف ابنه دكتور ولا مهندس ومش مشكله الولد عايز يكون ايه
اسف للاطاله رغم انى مقلتش حجات كتير

اولا منورنا ياباشا والله
انا اتفق معاك وبشده فى كل كلام حضرتك
وجميل ان حضرتك تناولت موضوع الكادر الى عاوزله كادر :D

واخيرا شرفت البلوج بجد

dr.shoshr said...

:loverheart:
أنا بأضم صوتي لصوت عمرو
اصل بصراحة احنا بندخل المحاضرة عمر
ييجي يقعد جنبي يبقي تنسي المحاضرة دي

وفرحان وانت بتقول كده :P

Dr MeRo said...

أبو صلاح ابن الناظر انت جيت امتى و حطيت البوست ده امتى؟


loverheart said...
أنا بأضم صوتي لصوت عمرو
اصل بصراحة احنا بندخل المحاضرة عمر
ييجي يقعد جنبي يبقي تنسي المحاضرة دي


احم احم تقريبا عمر ده اللى هو العبد لله يا سامح كلامنا مش هناانت اللى جبته لنفسك

سمـــــــــــا said...

بصراحة الموضوع حلو وواضح انك لسة بتعانى منه بس انا الحمد لله عديت من المهزلة دى على خير وبصراحة انا كنت من انصار عدم حضور المحاضرات بس مكنتش برضه بقعد فى الكافيتريا انا بقى بصيت للموضوع بنظرة ايجابية وقلت الجامعة مش هتطير انشالله اخدها فى 10 سنين ونزلت دورت على شغل واشتغلت وكملت دراسة والحمد لله منزلتش فى الجامعة غير سنة واحدة بس فى نفس الوقت قدرت اخد خبرة فى الشغل وقدرت برضه اصرف على نفسى بدل ما كل شوية اقول لاهلى عايزة فلوس ولما اصحابى خلصوا دراسة اللى بعد اربع سنين واللى بعد خمسة كنت انا اخدت خبرة فى الشغل خمس سنين عن اللى فى سنى . فانا رأى انك لو رافض وضع حاول تغيره او دور على غيره يعنى لازم يبقى فيه بدائل متوقفش حياتك لاى سبب الحياة هتفضل فيها سلبيات كتير تكتفنا ولو وقفنا فى مكاننا يبقى عمرنا ما هنعمل حاجة . خلى عندك أمل وحاول انك بأيدك انت اللى تغير الحياة على الاقل الحياة بتاعتك انت .

تحياتى بوست جميل

dr.shoshr said...

:drmero:
انت ايه الى جابك هنا يابنى

:D

dr.shoshr said...

:سما:

اسعدنى مرورك جدا
اما بالنسبه لموضوع التغيير فصعب انك تغير السلبيات لوحدك وبعدين ياريتها حاجه واحده بس ولا اتنين ....لأ دى حاجات ماتتعدش

ويارب دى ماتكونش اخر مره تمرى فيها على البلوج :D

break said...

انا عمرى ما شفت الفيلم دا من بدايته و عمرى ما كملته
بعتبره نحس دايما
ما علينا
بس فعلا موضوع متميز
فى دكتور حاول يساعدنا اد ما يقدر
دكتور الهستولوجى
و نزلنا المحاضرات على النت
و كانت النتيجة ان محدش مننا هيحضر المحاضرة بعد كدة
ماهى بقت جاهزة عندنا
على رأى هانى رمزى
مفيش فايدة

:)

dr.shoshr said...

:break:
الفيلم ده انا بحبه جدا ولازم تشوفيه من اللاول لللاخر :D

اما بقى بالنسبه للدكتور انا سمعت والله عن الموضوع ده
بس جزاءوه ان ماحدش يحضر ..غريب حال المصريين
مافيش فايده :D

منوارنا دايما يادكتوره

loza said...

@الناس بره بيتعلموا مش عشان النجاح الى احنا بندور عليه بس


بلد بتاعه شهادات صحيح :D

dr.shoshr said...

:loza:
ماينفعش التاخير ده كله :P
ماهو انا مش عارف لما التعليم عشان النجاح
بنتعلم ليه:d

منورانا دايما يافندم

sa'7so'7te said...

هممممممم
انا من ساعة مادخلت الكلية وانا فعلا بفكر فكده

خصوصا لما الدكاترة يقولولك انت عايز العلم بالمعلقة " ودى جملة كلهم حافظينها" زى مايكون بمزاجنا
يا شوشر العيب مش فى الاسلوب العلمى فى التدريس بس
لا العيب فينا كمجتمع وبلد

بجد انا نفسى ييجى يوم ابقى بدرس حاجة لمجرد المعرفة بالشىء
قلبت عليا المواجع

dr.shoshr said...

:sa'7so'7te:
والله يادكتوره انا مش قلبت المواجع عليكى بس لا علينا كلنا

وفعلا الموضوع دع عشان يتعدل مش يتحل على الاقل لازم ثقافه الشعب تتغير من ال زيرو

وشكرا على مرور حضرتك

محمد المصري said...

ولا عزاء للعلم في مصر..العلم اللي بنتعلمه عشان ننجح وناخد مجموع وخلاص..والحمد لله على كل حال..
شكراً..
محمد المصري

dr.shoshr said...

::محمد المصري::

منور يادكتور محمد

والله انا من قيمه كام يوم بفكر برده ليه؟
ليه ايه صحيح:Dبفكر ليه لما نيجى نقلد الغرب بناخد الى على مزاجنا وهوانا ونسيب المهم

زى مثلا المناهج الى بندرسها من اكتشاف علماء الغرب بس بره بيدرسوا الى هاينفعهم فى حياتهم مش اى حشو وخلاص


نورت ياباشا

break said...

يااااااااااااااااه
انتوا لسة منزلتوش حاجة جديدة
احنا فى الاجازة
كل سنة وانتوا طيبين

Dr MeRo said...

اجازة ايه بس كلنا كان معانا مواد تخلفات