:: فضفضة :)::

بسم الله الرحمن الرحيم


ودي أبكي , لين ما يبقي دموع
ودي أشكي , لين مايبقي كلام
من جروحي اللي صارت بقلبي تنوح
ومن هموم حرمت عيني المنام

وارجع أقول تاني

مباحبش حد يشوف
أي دموع في عنيا
علشان لا أصعب عليه
ولا يزعل عليا

وارجع اقول

انطفت في دنيتي كِل الشموع
والهنا ما يوم في الدنيا يِدام
غربتي طالت متي وقت الرجوع
كل عام أمني أحلامي بعام
إن شكيت الحال ماحد لي سموع
وان سكت الناس زادوني ملام

ده كله ليه

عشان كنت عايز اتكلم أو بمعني أصح

أفضفض شوية

الحكياة هتبدأ منين ؟؟!! انا مش عارف بصراحة أبدأ منين او ازاي بس أكيد فيه بداية
حكايتي مع الثانوية

اولا ماكانش فيه امل خالص اني ادخل الكلية دي هتقولي ليه لاني ماكنتش باحب الرياضة
ولا كنت باحل حتي المسائل اللي كنا بناخدها واجب في المدرسة او الدرس يعني كنت بايعها
طيب و إيه دخل الرياضة في كلية صيدلة جبت فيها 43,5 وده كان كويس ووحش
كويس لاني ماكنتش باذاكر وجبت فيها كده ووحش لاني حسيت اني نزلت جااامد السنة دي
ومش هاعرف ادخل صيدلة لاني جبت ساعتها 93.5 :( طبعا كان الوضع صعب جدا
عندنا في البيت لانهم واخدين ان انا باطلع الاول علي طول من اول الاعدادي خدت ال 3 سنين
اكتساح الابتدائي الاول لحد رابعه طلعت فيها التاني وبعدين سنه خمسه الاول ف الانجازات دي كلها
كان المفروض انها تدي حاجه كويسة في الاخر وانا راجع البيت بقي بعد ماجبت النتيجه كان بالليل
متاخر طبعا وراجع وماما علي أعصابها لسة ماتعرفش حاجة فلقت وشي متغير وخلاص هاعيط مع اني
مش باعيط قدام حد بسهولة , فعرفت ان النتيجه مش كويسه , قعدت تطبطب عليا وضمتني ليها
وقعدت تقولي فداك الدنيا كلها , واول ماحد بيكلمني في حاجه زي دي باعيط علي طول باحس ان انا
قصرت ناحيتهم وهي هتموت عليا لاني كنت مش بافتح بقي خالص ولا باتكلم ولا نطقت بكلمة
باعيط وبس قعدت تهديني وتقولي بس لايحصلك حاجه , والكلام ده وانا كل اللي في دماغي ان انا
أول فرحتهم ابنهم الكبير ابن ماما واخوها وابوها وكل حاجه في حياتها الحلم اللي طول عمرهم يحلموا بيه
يطلع سراب كانوا علي طول من اول الابتدائي يقولولي يادكتور كان نفسهم ابقي كده وانا كمان كان نفسي ابقي
كده , الحلم ده اتهدم قدامهم في لحظة لحطة النتيجه لان 93.5 دي خلاص مش هتعمل حاجة
المهم الاجازة كلها قاعدين يقنعوني اني احول رياضة 93.5 دي تدخلني هندسة مستريح لو جبت حتي قدهم
مش اكتر منهم السنة اللي بعدها , واصحابي برده حاولوا يقنعوني بكده وانا رفضت ده كله لكن زي مابيقولوا
الزن ع الودان اقوي من السحر المهم اقتنعت برايهم وخلاص الدروس هتبدأ فرحت لمدرس الرياضة اللي اتفقت
اني اروح عنده حصة واحدة وما اتكررتش
رجعت تاني وقلت الحلم اللي حلموه واللي انا حلمته مش ممكن يتغير الا لو ربنا ما ارادش وهاكمل في علوم
وفعلا كملت في علوم , الزن بدأ تاني دي سنه تالتة اصعب من تانية وبعدين فيها فيزياء وهي مشكلة الثانوية
هتعمل فيها ايه بس برده صممت علي قراري وقلت انا اللي هاتحمل مسؤلية القرار اللي انا خدته وهما بصراحة كانوا فاقدين الأمل فيا جدا وهم اللي قالولي بس بعد نتيجه سنه 3 ثانوي
اكيد مش هيقولولي قبلها عشان مايحبطونيش كملت في علوم وكان ليا هدف وإرادة فعلا اني لازم ابقي زي مانا
عايز وزي ماهم رسموني في دماغهم
والحمد لله جت سنه تالته وامتحنا وانا راجع من الملعب كنت بالعب كورة - اجازة بقي - لقيتهم مقابلني
مبروك مبروك انا قلت النتيجة وكنت خلاص هاموت وأشوف انا عملت ايه لان لو كانت النتيجه مش كويسة
اكيد كل حاجه بغذن الله بس اكيد كان هيبقي فيه لوم من ناحيتهم ان انا ماسمعتش كلامهم وكده لكن الحمد لله
وبتوفيق ربنا جبت 99.5 والحمد لله المجموع بقي 96.5 وقلت الحمد لله علي كده وبقيت مستني التنسيق
وكانت القاهرة خدت من نفس مجموعي 96.5 وطنطا خدت 96.2 تقريبا بس كنت كاتب طنطا الاول
فدخلت طنطا والحمد لله

دخلت صيدلة

الحمد لله مشينا فيها وبعدين الدروبات كترت شويه وهو ده الهم انك تعدي للسنه اللي بعدها بمادة
ولا مادتين وده اللي حصل معايا وخصوصا السنة دي كان معايا عضوية بتاع اول ترم ناخد فيها عضوية
اللي هو لسه ممتحنينه السنه دي بعد الامتحانات اللي حصل اني طبعا هاقولهم ع النتيجة وطبعا هم كان في
بالهم اني ع الاقل مش هاشيل لكن اللي حصل اني شلت عضوية المهم قلت
لماما وهي طبعا اللي هتقول لبابا وعدت علي خير لكن اللي كان بيحسسني بالذنب اكتر الموقف اللي عمله معايا بابا فعلا كل يوم باكتشف فيه حاجات جمييييييييلة كتيرة وباتعلم منه حاجات كتيرة لما اتقاله خبر النتيجه اكيد اكيد
زعل جدا بس طول الاجازة ما اتكلمش وكان بيعاملني علي انه مايعرفش حاجة خالص عنها ولا كان حاجه حصلت
سابني براحتي استعمتع بالاجازة هتقولوا المفروض برده يكلمك في القصور اللي كان من ناحيتك مايسيبكش كده يعني
وده فعلا حصل بس امتي الكلام ده

كنا داخلين الكلية يوم السبت طبعا أو الحد حسب الجدول هو كلمني امتي في الكلام ده تصوروا يوم الجمعة اللي قبلها علي طول
يعني سابني طول الاجازة مارديش يعكنن عليا وكلمني في آخر يوم في الأجازة و الحكاية دي هتفضل معاي لحد ما اموت
مش هانسي الموقف ده ابدا
وعشان كده قلت لازم اعمل حاجة الترم ده وأذاكر واخلي روح الارادة والتحدي يرجعوا تاني
وذاكرت فعلا ذاكرت عن الاول بكتير يعني وكنت منتظر الترم ده يبقي صافي ويبقي بداية لصفحه جديدة
زي زمان لكن
و الحمد لله طبعا علي كل حاجة شلت تاني :(

انا ذاكرت فعلا بس مش المذاكرة بتاع سنة تالته ثانوي مش بنفس الروح هل لان انا الوحيد اللي من بلدي
في الكلية دي مافيش حد معايا زي الثانوي مثلا فمش في دماغي المنافسة قوي اللي بتبقي مابينا
هل الواحد خد علي كده
ولا هل انا اللي نفسي ابقي كده
مش نفسي ابقي كده أبدا وياريت يعرفوا ان انا مش نفسي
أبقي كدة أبدا

ومش باعترض علي قضاء الله

قدر الله وماشاء فعل

وان شاء الله تكون بداية كويسه السنة الجاية

قلت الكلام ده كتير لكن ما اتحققش في الدراسة الا مرة واحده اللي كانت
السبب ابقي في الكلية دي ويارب يتحقق المرة دي كمان
واقدر افتح صفحة جدية

طولت قوي

بس كنت عايز اتكلم

وافضفض شوية