1:42 PM

مصر أم الحضاره

طبعا كلنا عارفين ان فى أوروبا والدول المتقدمة الإنسان له مرارة واحدة..انما ف مصر أم الحضاره نتيجة للشلل اللى احنا عايشين فيه.. استطاع العلماء المصريون انهم يزودواعدد مرارات الإنسان عشان تتناسب مع الخنقة اللى احنا فيها..وهيه مصر إيه غير شوية خنقات فوق بعض

بس ياجماعة المسألة تجاوزت مرحلة المرارة ودخلت على الشلل الرعاش والبنكرياسه اللى
مش عارف إيه هيه

كلنا اتفرجنا على منتخب مصر وكلنا فرحنا كلنا انبسطنا بالروح العالية للمنتخب والتديّن والترابط كلنا حبينا أبو تريكة واتعاطفنا مع تعاطفه مع غزة..وكلنا بنفرح لما نشوفه على الشاشة.. وانا بصراحة بحبه ومش عشان موهبته ولا حرفنته لأن فيه لعيبة حلوين كتير سواء هنا أو برة.. أنا بحبه عشان تواضعه وتدينه.. وانا باحب أى حد موهبته بتزيده
تواضع وبساطة وقرب من الناس

عارف طبعا ان ده إنجاز وفخر لينا ومش معترض على ده

،أنا معترض على حاجة تانية نائب محترم مقدم طلب للمجلس المحلى عشان الدولة تطلق
اسم حسن شحاتة على أحد شوارعها الرئيسية

علامات التعجب اللى فى الكيبورد مش هتكفـّى..طب ينفع الكلام ده بالله عليكم..يعنى هوّه كل واحد فاز فى كام ماتش نعمل على اسمه شارع.. طب والغلابة اللعيبة دول مش ليهم نفس..يعنى مثلا يبقى حسنى عبد ربه..وميدان وائل جمعة..وتمثال إبراهيم سعيد وهوه صابغ شعره أحمروللا السواق بقى فى الأتوبيسات..حد نازل سيد معوض يا جدعان .. حد نازل سيد معوض؟؟

والمشاكل اللى تحصل بين الركاب والسواق بقى انت مش قلت انك هتلف من ميدان عماد متعب؟؟ جبتنا من ميدان عمرو زكى ليه؟؟يرد السواق: ياجماعة كان لازم عشان المرور أدخل من شارع البطل أحمد فتحى..واركن فى ميدان أحمد حسن.. ونسمّى السد العالى فى أسوان على اسم الحضرى.. يبقى العيال فى المدارس يروحوا الاقصر وأسوان يزوروا معبد الكرنك والسد الحضرى ومحمد زيدان احتمال يسمّوا الهرم الصغير على إسمه.. يبقى أهرامات الجيزة.. خوفو وخفرع وزيدان أما أبو تريكة له نظام مخصوص طبعا.. ده احتمال يسموامطار القاهرة على إسمه.. يبقى اسمه مطار أبو تريكة الدولى وتنزل بقى الدعاية فى التليفزيون:عزيزى العميل..إذاحصلت على كأس احصل على شارع أو ميدان مجانا فى شوارع القاهرة..نحن نختلف عن الآخرين..استلم شارعك لحد البيت

ياجماعة احنا عارفين ان البطولة دى حسستنا بالفرحة فى وسط أيامنا دى..بس برضه مش عايزين الفرحة تعمل فينا كده يعنى.. دى اسمها كورة .. أولا وأخيرا لعب يعنى داحنا معرفناش أحمد زويل إلا لما أخد نوبل.. ولما جينا نكرّمه عملناعلى إسمه كوبرى ثروت عند جامعة القاهرة..وبقت اليافطة مكتوبة..كوبرى أحمد زويل..ثروت سابقا..انت متصوّر ان حاجةاتغيرت؟؟ أبدا.. لسة الناس كلها بيقولوا عليه كوبرى ثروت والسواقين بيقولوا عليه كوبرى ثروت.. عشان بس لما أحمد زويل يزعل وللاحاجة.. نقوله عملنا باسمك كوبرى والناس اللى مش طايقاك يا أخى

مش مكسوفين لما تبقى كل سمعتنا برة مصر اننا بلد عمرودياب وتامر حسنى وعادل إمام ودينا وفيفى عبده وكأس أفريقيا..
وميعرفوش ان البلد دى خرجت أعظم علماء ومفكرين ومبتكرين وسياسيين على مدى التاريخ

طب والفلوس دى اللى نازلة على اللعيبة(مش حقد والله)..كل لعيب مليون من هناومليون من هناك..طب احنا كنامعاكم بنشجعكم وانتوا عريانين فى الملعب قاعدين تسفـّوا التراب عشان تجيبوا جون..إنما نشجعكم ازاى دلوقتى وكلواحد فيكم طالع نازل بملايين من كل دولة..طب الموظف الغلبان اللى مش عارف يجيب إزازة زيت عشان بقت بتمانية جنيه ومش من النضيف يعنى..يعمل ايه وهوه شايف شاب من دور ولاده فى أسبوعين أخد كام مليون..أظن ده هيروح لابنه وهوه بيذاكر يقول له:مذاكرة ايه يا ابن الـ***.. قوم فزّ انزل روح العب فى الشارع جايز ربنا يكرمك وتدخل المنتخب

طب يعنى ما تخلوا المكافآت دى بينكم وبين بعض يعنى الأمير سرحان بن فهمان آل وهبان عايز يرش رشة على المنتخب ياخدهم فى قصره من سكات ويخليهم يفتحوا ايديهم كده ورا بعض وهوه يمر عليهم باللى فيه النصيب..ولا من شاف ولا من درى ورجل الأعمال سعود بن فهود آل عبود عايزيظبط اللعيبة..يزور كل واحد منهم فى بيته ويرش عيدية على العيال ولادهم وخلاص.. بدل ما كل شوية نتحسر على الأرقام اللى الناس دى بتاخدها يعنى..

احنا بشر يعنى ياجدعان وجتـّتنا مش جِبْس والله
منقول

11 comments:

محمد أبو الفتوح غنيم said...

بوست خطييييييييييييير يا عم الحاج

تسلم الأيادي

و عندك حق احنا ملناش هدف عشان كدا أي حاجه تنسينا الي احنا فيه بتبقى حلوه

LioRomio said...

Ana a7`adt general look 3ala el blog keda b3d ezn 7adretak tb3an :) It's so amazing msA...

and this post especially...i found it soo gr8 7`ososan enn elmawdoo3 7`alas 7`eles w ba2a baye7` ba2a...

Bgd teslam eedak

w sorry for disturbance...


Grazie...

موناليزا said...

اول ماقريت البوست حسيت انى قراته قبل كده ولان بعض الظن اثم فحبيت اتاكد ولقيت ان فعلا نفس هذا الموضوع ماخوذ من مدونة اخف دم لاشرف توفيق ويمكن تكون صاحبة واستاذنته دى مفيهاش حاجة بس ياريت كنت تنوه ان هذا البوست منقول من هذة المدونة سالفة الذكر
www.akhafdamm.blogspot.com
وعنوان البوست "مبسوطة يامصر"
بس ليه مكملتش بقية الموضوع؟

shoshr said...

:monaliza:
اولا شرفنا مرورك فى البلوج
وثانيا:الموضوع ده عمر هو الى اعلم بتفاصيله وان شاء الله هايقولنا على التفاصيل بس هو مستاذن من صاحب الموضوع الاصلى

Dr MeRo said...

monaliza
حضرتك البوست ده انا اخدته من كاتبته الأصليه و كان موجود على أحد المنتديات و استأذنتها و هى قالتلى ان مفيش اى مانع
اما بالنسبه لباقى البوست فا انا مكملتوش عشان بجد هو بيتكلم فى كلام سياسى يمكن أنا مش مقتنع بيه او مش متفق معاه
ميرسى على مرور حضرتك و يارب البلوج تكون عجبتك

kalcool said...

مش هقول غير كلمه واحده بس

يبقي انته اكيد في مصر

تحياتي

loza said...

هم يبكى وهم يضحك وهم يا جمل :(

موناليزا said...

اخى الفاضل اسعدنى جدا ردك واهتمامك وماتقوله معناه ان عندك امانة للنشر احييك عليها ولكن معذرة فالموضوع لرجل وليس لفتاة ولو دخلت على هذا الرابط ستعرف ما اقصده
فصاحب البلوج يشتكى من احوال من ينقل مواضيعه دون ذكر اسمه عليه وهذا معناه ان الاخت اللى منزلاه فى المنتدى هى اللى واخداه من غير استئذان
ارجوك زور هذا الرابط وانت تعرف مايشعر به صاحب المواضيع المنقولة
www.akhafdamm.blogspot.com
هتلاقى موضوع بعنوان "خد بالك عليا" اسفة للاطالة واشكرك لسعة صدرك

shoshr said...

monaliza

اولا احنا اعتذرنا على اننا لم نكتب كلمه "منقول"بغض النظر عن من هو صاحب المنتدى

ثانيا:ميرو استأذن من كاتبه الموضوع على المنتدى انه ينزله فى البلوج وهى رحبت

اما بقى الموضوع انه بتاعها ولا مش بتاعها ده مايخصناش احنا مش هانحاسبها انها ماقلتش انه منقول او انه مش بتاعها

احنا مش مطلوب مننا ان احنا نعمل تفتيش ورا كل واحد ونشوف ده موضوع ولا لأ

وشرفتى البلوج يافندم

Dr MeRo said...

dr.shoshr said
احنا مش مطلوب مننا ان احنا نعمل" تفتيش ورا كل واحد ونشوف ده موضوع ولا لأ"

أتفق معك تماما يا صديقى

الستة بتوع صيدلة said...

بنحب نناديكم تيجوا تحضروا اول عيد ميلاد للمركب عندنا

ما تتأخروش